“स्वास्थ्यका लागि खेलकुद, राष्ट्रका लागि खेलकुद” भन्ने मूल नाराका साथ जुगल नव गुरुकुल तेक्वान्दो डोजाङ्ग द्वारा विभिन्न ४२ डोजाङ्ग तथा विद्यालयकको समूहका करिब ७०० जना विद्यार्थीहरूको सहभागितामा “प्रथम जुगल नवगुरुकुल काठमाडौं जिल्ला स्तरीय तेक्वान्दो प्रतियोगिता तथा सम्मान कार्यक्रम-२०८१” सम्पन्न भएको छ। बुढानीलकण्ठ नगरपालिका १० कपनमा अवस्थित जुगल नव गुरुकुलको प्राङ्गणमा सो प्रतियोगिता सम्पन्न भएको कुरा विद्यालयका फाउन्डर प्रिन्सिपल गिता बहादुर लामिछाने (रुपक) ले जानकारी गराउनुभयो।
विद्यालयका अध्यक्ष डोरप्रसाद आचार्यको सभापतित्वमा आयोजित प्रतियोगिता बिहान ८ बजे देखि सुचारु गरिएको थियो। ७०० जना प्रतियोगी अन्य विद्यार्थी , अभिभावक, अफिसियल रेफ्री तथा अतिथिहरु गरी एक हजार भन्दा धेरैको प्रत्यक्ष सहभागिता भएको उक्त कार्यक्रम भव्य रुपमा सम्पन्न भएको र काठमाडौं जिल्लामा नै पहिलो पटक यति धेरै सहभागितामा तेक्वान्दो प्रतियोगिता सञ्चालन भएको आयोजक विद्यालयका प्रिन्सिपल लामिछानेले जिकिर गर्नुभयो।
प्रतियोगितामा अफिसियल खेल तर्फ ६ स्वर्ण र १ कास्य पदक सहित ज्याक्मा मिलेन, जोरपाटी डोजाङ्गले प्रथम स्थान, २ स्वर्ण र २ कास्य पदक सहित धौलागिरी डोजाङ्ग दोस्रो र १ स्वर्ण २ रजत र १ कास्य सहित मैजुकुमारी डोजाङ्ग तृतीय स्थान हासिल गर्न सफल भएका थिए । प्रथम, द्वितीय र तृतीय हुने डोजाङ समूहलाई कार्यक्रमका सभापति एवम् जुगल नवगुरुकुलका अध्यक्ष डोरप्रसाद आचार्य, प्रिन्सिपल गिता बहादुर लामिछाने र कार्यक्रम संयोजक एवम् जुगल नवगुरुकुल डोजाङ्गका मुख्य प्रशिक्षक नवाङ लामाद्वारा नगद पुरस्कार रु.१०,०००, रु.७,००० र रु.५,००० सहित ट्रफीद्वारा पुरस्कृत गरिएको थियो। त्यसै गरि उत्कृष्ट फाइटर पुरुष तर्फ निश्चल ढोली र उत्कृष्ट फाइटर महिला तर्फ सारदा बम्जनलाई नगद सहित ट्रफी मेडल र प्रमाण पत्र द्वारा सम्मान गरियो।
बुढानीलकण्ठ नगरपालिकाका नगर प्रमुख मिठाराम अधिकारीको प्रमुख आतिथ्यमा सम्म्पन्न उक्त कार्यक्रममा ग्रीष्मकालीन पारा ओलम्पिकका कास्य पदक विजेता पलेसा गोबर्धन र पारा ओलम्पिकका कोच कविराज नेगी लामालाई नगदसहित दोसल्ला ओडाएर सम्मान गरिएको थियो । विशिष्ट अतिथिमा बुढानीलकण्ठ १० का अध्यक्ष एवम नगर प्रवक्ता नवराज भट्टराई, बुढानीलकण्ठ १२ का अध्यक्ष शम्भु भट्टराई, बुढानीलकण्ठ ८ का वडाध्यक्ष एवम् खेलकुद विभाग प्रमुख सुमन तामाङ, नेपाल तेक्वान्दो संघका विभिन्न जिल्ला तथा प्रदेशका पदाधिकारीहरु, बुढानीलकण्ठ नगर प्याब्सनका अध्यक्ष एवम् शिशु मिलन स्कुलका अध्यक्ष राधेश्याम श्रेष्ठ, नगर प्याब्सनका कोषाध्यक्ष एवम फेरिल्याण्ड इन्टरनेसनल स्कुलका प्रीन्सिपल विष्णुचन्द्र अधिकारी, जुगल नवगुरुकुलका सस्थापक मोहन थापा, स्कुलका सह-प्रधानाध्यापक श्यामा पन्त बिमली, डम्बर ढकाल, विभिन्न विद्यालयका प्राचार्यज्यूहरु, एनप्याब्सनका पदाधिकारीहरु, मिडियाकर्मी तथा सुरक्षाकर्मीहरुको उपस्थिति रहेको उक्त कार्यक्रममा जुगल नवगुरुकुलका विद्यार्थीहरूले गरेको नृत्य एवं एनटिए डेमोस्टेसन समूह द्वारा प्रस्तुत गरिएको डेमोस्टेसनले कार्यक्रमको थप शोभा बढाएको थियो।
विभिन्न तौल समूहमा विजेता भएका विद्यार्थीहरूलाई मेडल तथा प्रमाण पत्र द्वारा सम्मान गरिनुका साथै एनटिए डेमोस्टेसनका प्रमुख श्याम थापा मगर र बर्गर हाउस बालुवाखानी शाखाका फुर्पा लामालाई समेत सम्मान गरिएको थियो।
प्रतियोगितामा नेपाल तेक्वान्दो संघ काठमाडौं जिल्लाका पदाधिकारीहरूद्वारा अफिसियलको भूमिका निर्वाह गरिएको थियो।
(तस्वीर)
